立法會議員朱凱廸早前多次引用議事規則「奇招」，成功阻延政府同建制派強推高鐵「一地兩檢」決議案後，向來以鬧民主派為嗜好嘅建制派議員何君堯，上周喺facebook直播時竟然一反常態讚朱凱廸，讚乜？讚佢「好勤力」、「講嘢有層次，亦有啲points」，但當然好戲在後頭，何君堯話可惜朱凱廸「用錯地方、偏執咗」同「企錯位、諗錯嘢」，話朱有可能「投胎時候投錯咗，可能以為自己係日本人，或者已經喺港英殖民地好耐，唔覺得（香港）回歸中國，係一個值得驕傲嘅事情」。
讚陳健波勁好多
除咗評論朱凱廸，何執葉不忘批評上周泛民留守會議廳抗議下、最終宣佈休會嘅立法會主席梁君彥，話希望梁君彥同立法會秘書處下次要「洗心革面」，立法會主席下令趕人走時，一定要做到，「攞吊臂車又好、鏟泥車又好、Robocop（鐵甲威龍）都好」。
八方就何君堯言論問過朱凱廸，佢話上述言論係何君堯一向本色，自己過去都有睇過何君堯面書，仲覺得「衝擊波」陳健波面書言論比何君堯「勁好多」，可惜留言都係自己友圍爐取暖多囉。對於何君堯「讚賞」，朱凱廸話唔知係咪同佢早前嗰篇一地兩檢發言有關，佢話當日發言，其實都係想呼籲建制派唔應該「屁股決定腦袋」，希望立法會唔好「人大化」喎。