大閘蟹姍姍來遲，但秋蟹正肥，無謂為棵樹放棄個森林，不同品種蟹燕瘦環肥，仲可以配中西美酒，為配合旅發局剛過去嘅美酒佳餚巡禮及香港盛宴11月，海港城就搞咗個秋蟹配汽泡酒季節限定盛宴，仲喺剛開放、海運大廈新擴建嘅「海運觀點」舉行，品嚐佳餚美酒兼欣賞日落、夜景。
活動舉辦至11月30日，由16間餐廳合作炮製秋蟹及配搭汽泡酒，包括天穴、Paper Moon、西村及羲和雅苑等。另外即日至11月12日逢周四至日會有Sparkling Sunset品酒化裝派對，憑指定消費免費換領通行證可品嚐汽泡酒及美食、試化裝、由專人用Polaroid古董相機拍即影即有照片等。