專為公務員而設嘅2017年公務員事務局嘉許狀計劃噚日舉行頒獎禮，今年有100位有卓越表現嘅公務員獲獎。攞獎嘅公務員至少要連續5年工作表現被評為A（優秀）先符合提名資格，最後由公務員事務局局長揀選，每位得獎者都可謂過五關斬六將。
消防隊目難忘救外國人
今年其中一名得獎者係消防處消防總隊目陳華洪，佢加入政府逾30年，負責潛水拯救工作。佢分享工作點滴，最難忘經歷係喺中環碼頭救一個懷疑遇溺嘅外國人，外國人泳術唔係咁叻，但見到潛水員就不斷大叫同游開，所以救佢上岸都唔係咁易，而呢個外國人喺海上游咗一段時間後，攰得滯攤喺碼頭樓梯，陳Sir見時機到就同其他同事夾手夾腳拉佢上岸，好彩最後大家都冇受傷。佢話有個願望，希望越嚟越多人重視海上安全意識。
今年最多人拎獎嘅部門係警務處，共有18人。警察隊員佐級協會主席陳祖光都有份，佢曾經喺七警案審判時搞咗個「會員特別大會」，仲話要籌款畀佢哋上訴。