堪輿學家麥玲玲最近「不吉」，皆因佢親戚周二以68蚊正價，喺尖沙嘴金馬倫道報紙檔買入佢本2018狗年運程書，當時本書以透明封套包好，打算等佢簽名後再送畀朋友，點知玲玲發現呢本書雖然內容同正版無異，但封面、封底相片明顯較模糊（圖），亦冇原版封面立體燙金效果，紙質都較差，懷疑係盜版貨，但內容八成似，擔心顧客唔識分。
其實呢本狗年運程書近日先開賣，但本周已發現內地淘寶網有售，價錢由8.8至近百蚊人民幣都有，玲玲話若有人以正價出售盜版書，利潤驚人，對香港公然賣盜版書感到驚訝，噚日已聯絡出版商新傳媒，要求代為跟進並向海關舉報。新傳媒證實喺涉事報紙檔買到老翻運程書，正調查來源。海關回覆時話已接獲相關舉報，並正作出適當跟進。