相信前財政司司長曾俊華都估唔到，無薪幫香港電台主持一個節目，竟然因為冇申報而被追殺，但呢個《香港故事－修復時刻》節目，最終大步檻過，本月18日星期六晚9點會喺港台31台首播，總共10集。
埋怨紮花幾廿年都未收到
難得特區政府免費幫手宣傳，港台真係講多謝都嚟唔切，薯片叔亦好重視呢個baby，喺個人facebook貼咗節目嘅宣傳片，片中可見每集都以「修復」為主題，例如修復裂痕、修復記憶、修復廣東歌、修復家庭、修復南音同修復自信等，薯片叔唔只聲演，仲喺採訪故事中親自上陣，例如學習修復傳統工藝金繼，修復家庭一集更同曾太黃蓮華拍拖登場，其間兩人耍花槍，曾太翻舊賬話拍拖時薯片叔帶佢返紐約嘅屋企，當時話過樓下有間花店，但嗰紮花到𠵱家都未收到，薯片叔一貫笑笑口，然後話間花店都冇咗，搞到曾太即時反問「咁即係唔使送呀？」
喺梁班子時代任財爺5年，薯片叔對於撕裂，肯定好多感受，佢亦喺fb帖文話，「因為裂痕，才會有深刻的記憶；因為修復，才懂得甚麼叫珍惜」，佢share港台段片嘅hashtag都好抽水，「申報定只係得港台電視31先有得播」、「等出街嘅時間仲長過講施政報告」，唔知會唔會令大家發出會心微笑，最終如願「希望個page嘅like like多到上個鼻度」？
李八方