香港「不敗拳王」曹星如（Rex）喺10月7日舉行嘅《王者對決3》以點數贏咗日本拳手河野公平，取得職業生涯22連勝，但佢就因為左眼受傷入咗院留醫。而Rex早前就喺ig上載左眼消腫相，仲話自己要暫停工作一排，畀對眼好好唞下；而佢亦透露fb page本來係由拳館同事打理，由依家開始，佢會自己打理番。
至於一手帶星如入職業拳賽的前經理人兼現任香港拳擊推廣人劉志遠，都好贊成Rex嘅決定，佢話：「過去六年，星如每日都練得很辛勤，為了以後，他應該好好休息一下。」
Rex喺ig咁講：
「一個運動員，身體受傷喺在所難免的。即使帶住身體上嘅各種傷患，我亦會一路做物理治療一路訓練去準備比賽！過程中需要忍受嘅痛楚，我都會捱過去。但近依兩場比賽中，我雙眼都受到撞擊。
先喺係今年3月對向井寬史，比完賽幾日後，發現右眼視力模糊，睇完醫生，醫生都係話只可以「等」時間去康復。喺6月尾開始投入訓練前，再去睇醫生，都未完全康復！但因要準備10月的賽事，所以都唔可以再「等」！
輪到上一場比賽，對河野公平。今次到左眼受傷。由於今次隻左眼腫到睜唔開，需要用3個星期嘅時間消腫後先可以睇醫生。醫生都話只可以「等」！「等」瘀血散走、眼球裏面消腫和視力回復正常。而醫生都建議唔好受到撞擊同強光嘅刺激下康復會比較理想。
所以我決定完成埋手頭上嘅工作後，暫時停止訓練、比賽和拍攝工作。等雙眼可以好好休息一下。預計會休息大半年。但我對拳擊嘅熱誠係唔會減退的火。休養期間，如果有咩問題，可以ig聯絡我。
#我可能會係街撞到你地 #夜媽媽見我戴黑超唔好見怪 #隻眼仲未退紅 #康復之路」