禮拜日（29日）舉行今季唯一的一次谷草日賽，並用全闊A跑道。
睇番上季10月30日谷草日賽亦係用A欄，當日對前置馬頗為有利，其中「太陽旺旺」、「天時駿駒」（已退役）、「包裝騎士」及「越影」均放頭入直路帶到，另外「捷捷勝」及「翡翠紅星」（已退役）守貼欄包廂位建功，具前速之馬匹可優先留意。
今戰列陣馬中，第七場三班1000米的「實力飛駒」（蘇保羅馬房）以往曾於谷A欄日賽快放跑第二，證明並非局限只能在夜賽爭勝，回配潘頓搶出賺形勢可帶到。
另外，同廐第九場二班1650米的「連利之星」，上仗正是於谷A欄勝出，等番同一移欄再跑，其練馬師蘇保羅應有心添食起孖。