今屆娥班子有幾位政治助理留任，其中黎穎瑜（Jade）就由勞福局調至民政局做劉江華政助。現時為官嘅阿Jade自細興趣多籮籮，記者DJ都做過，喺凌晨時分開咪播歌，曾以女版鄭子誠身份，陪伴一眾夜歸人。
現年40歲嘅阿Jade廣州出世，5歲來港，細個讀書幾乎以課外活動為主導，「朗誦節、音樂節、演講同話劇，全部都參加」。於何文田華英中學讀到中四時，開始諗將來，的起心肝認真讀，結果會考有佳績，成功申請獎學金轉讀香港李寶椿聯合世界書院，其後喺中大社會科學以一級榮譽畢業。
牛津讀碩士遇上另一半
佢大學因緣際會喺商業二台兼職做DJ，逢一至五凌晨1點開咪播歌，但夜歸朝早返學冇精神，做咗半年就功成身退。入咗英文辯論隊嘅佢其後喺做記者嘅家姐介紹下，喺大一暑假加入英國ITN電台做記者。大學畢業後佢獲羅德獎學金到牛津大學修讀社會學碩士，返港後喺理大同香港大學專業進修學院教書，其後曾到智經研究中心同齊心基金會任職。牛津除咗令佢有亮麗履歷，仲令佢搵到另一半，佢位新加坡老公就係牛津嘅學長，拍拖一年就Long D，翌年暑假飛去新加坡註冊結婚兼行禮，兩人現時育有6歲大囝囝。