甜蜜蜜拍拖，或者一家大細出遊，梗係要搵啲新景點，令打卡時都有啲新意，最近就有個打卡好去處，背景係維港三面靚景，肯定天下無敵！
用咗5年時間，海港城海運大廈擴建大樓終於落成，焦點係免費開放嘅頂層觀景台「海運觀點」，只要上到去觀點台，就可以270度睇維港兩岸景色，無論係日落嘅浪漫feel、抑或神秘艷麗嘅夜景，呢度都滿足到大家。除咗觀景自拍，其實現場仲有兩個6,500平方呎嘅平台，包括一個天然草坪，畀大家喺度輕鬆漫步，預料月底正式開放。而同場戶外梯級式看台同表演場地，則可以容納約200人，接受外界申請做表演同舉辦活動。
料多容納千人睇煙花
查實新大樓由知名國際建築師事務所Foster + Partners設計，5層高大樓內有好多食肆，約有11間海景餐廳，當中4間已經開張，行到攰可以醫肚。而海運大廈原有嘅登船同出入境手續則移師至新大樓嘅地下樓層。九龍倉執行董事凌緣庭話，過去每逢節慶煙花匯演，都吸引逾一萬人喺海港城睇煙花，相信擴建後可以容納多1,000人，商場會作人流管制。
李八方