唔通係全國政協副主席，就可以巴閉啲唔使受規管？政圈近期掀起一場小風波，皆因前財政司長曾俊華為港台最新一輯《香港故事》節目做無薪主持，被特首辦窮追猛打話冇申報，仲打去港台了解，變相施壓，與此同時政府對同樣未有申報喺兩間非牟利公司任董事嘅前特首梁振英，卻未見關注，惹來外界質疑當局厚此薄彼。
曾經盛傳會同薯片叔組織「JT黨」嘅立法會前主席曾鈺成同自由黨榮譽主席田北俊，先後開腔疑似為薯片叔抱不平。曾鈺成噚日喺一個公開場合回應事件時，話注意到社會有議論指（嗱，佢冇話係佢㗎），政府處理曾俊華同梁振英離職後工作申報時取態唔一致，反映社會唔清楚掌握相關規定，覺得政府要解釋。佢強調，曾、梁都係佢朋友，佢唔知道兩人離任後嘅工作有冇區別，只覺得政府應就申報制講清講楚，因為公眾都有知情權。
暗示帶頭破壞規矩
薯片叔頭號支持者田少就喺 fb引述相關傳媒報道，並留言諷刺：「有咁嘅前行政長官，就有咁嘅前財政司司長，有乜咁出奇喎，有樣學樣箒」，擺明寸689其身不正，帶頭破壞規矩，繼而又指自己都做過商台主持，分毫不收，「唔通我又係幫人打工？！」。最厲害當然係hashtag，「除非係政治清算啦」、「咁幫視障人士籌款使唔使申報？」，暗示政府標準不一。
睇番吖，689被傳媒揭發出任「大灣區香港中心有限公司」同「一帶一路國際合作香港中心有限公司」兩間擔保公司董事後，先至補鑊向委員會補交申報，話公司非牟利，其間政府未見追打，又難免令人有大細超嘅質疑嘅。
李八方