前政制及內地事務局長譚志源（Raymond）同前財政司長梁錦松一向關係好好，而且兩個都係虔誠基督徒，Raymond唔做官之後，仲入埋由阿松創立嘅新風天域集團，再做阿松下屬，不過早排Raymond同阿松兩個竟對調位置，Raymond做咗阿松老闆，阿松仲要做埋Raymond司機！
大家唔好誤會，唔係佢兩個有乜事發生，一切只係為傳教，兩人為咗宣傳一個福音盛會，所以互換身份拍條宣傳片，片入面Raymond做老闆，阿松做佢司機車佢返教會，點知後來阿松入埋去，Raymond先知阿松都係教友，呢個時候坐喺阿松身邊嘅教友仲問佢，喺咪上次買車衰咗，所以先信耶穌？阿松就話唔係，似乎佢早已放低偷步買車件事，所以唔怕重提。佢兩個人扮鬼扮馬之後，再正正經經呼籲參加嚟緊嘅福音盛會，仲話佢哋兩個到時會上台，向到場教友作見證分享，唔知阿松會唔會分享佢信主原因？Raymond又會唔會講下唔做官之後嘅事呢？