八方日前寫過白鴿黨前主席劉慧卿下周「回歸」立會，出席立會《2017年僱傭（修訂）條例草案》公聽會，諗住到時發言撐呢條法例，正當好多人等緊卿姐再喺會議廳發威之際，佢噚日喺fb話自己擺烏龍，已經錯過去公聽會嘅機會。
卿姐話佢原計劃下周二去立會出席《2017年僱傭（修訂）（第2號）條例草案》委員會公聽會，講佢支持當局建議修例，加強規管外傭職業介紹所同完善聘請外傭制度嘅立場，點知擺烏龍，將《2017年僱傭（修訂）條例草案》委員會開會日期，同佢想去嘅《2017年僱傭（修訂）（第2號）條例草案》委員會開會日期搞錯咗，而後者喺噚日開會，所以佢錯過咗開會機會，佢喺fb道歉之餘，亦將佢嘅意見書交咗畀委員會秘書，一樣可以反映到意見，仲將成份意見書貼埋上fb。