公共專業聯盟噚日10周年晚宴，估唔到自從特首選舉後，好似冇再碰過頭嘅特首林鄭月娥同埋薯片叔叔曾俊華，終於喺同一場合前後腳現身。林鄭走咗10幾鐘之後，薯片叔先到場，唔係兩個有心互避對方，只係林鄭趕住聽音樂會要早走，不過林鄭臨走都不忘同公專聯主席司馬文舌戰。
「冇睇施政報告」
噚晚首先出場致辭嘅司馬文，提到公專聯早喺2008年就提出八達通七折優惠，估唔到林鄭真係喺施政報告做咗，但司馬文話佢哋2009年提出高鐵錦上路方案，政府肯聽，高鐵可能舊年已經起好！
輪到林鄭致辭時，佢就即場還拖，話做特首成日收到邀請，去晒好唔掂，收到司馬文邀請嗰陣意見仲叫佢唔去啦，一來噚日係黑色星期五、施政報告又出咗冇耐，不過林鄭話既然要新開始，就要用行動示範。之後林鄭仲抽埋其他人水，話佢嗰套新理財哲學就係要使錢，仲點名教育界葉建源話「I'm talking to you」教育可以使錢，又同社福界邵家臻講佢亦想投資到人身上，如少數族裔，之後仲同梁繼昌、郭榮鏗講，稅務、《檔案法》可以一齊做。
而遲過林鄭到嘅薯片仲高招。八方同唔少行家都問佢點睇林鄭份處女作，尤其林鄭提到透過減利得稅嚟推動研發等冇財政司做過嘅突破。薯片竟然話冇睇過份施政報告，因為佢有私人嘢要搞，冇時間睇喎。佢仲分享近來生活，不外乎籌款、音樂節目、享受同家人嘅時光。
李八方