藝術大師達文西幅《蒙娜麗莎》大家就聽得多睇得多，其實佢仲有幅同一時期創作嘅「男版蒙娜麗莎」《救世主》（Salvator Mundi），近年重現江湖震驚全球人類，下月中會喺紐約拍賣，叫價成1億美元，即係7.8億港紙。
60年前交易價僅$466
幅畫有咩咁巴閉？八方噚日就去睇真啲呢幅《救世主》：半身像耶穌着住藍袍，眼神迷離有啲神秘，左手握水晶球、右手祝福手勢。原來幅畫推算係1502年達文西為法國皇宮所創作，17世紀初因為宮廷婚姻俾人帶咗去英國，點知英國國王被人處決，由1763年起呢位耶穌就下落不明。20世紀收購時仲被誤會係大師學生嘅畫作，1958年交易價曾經低到45英磅（466蚊港紙）！
幅畫去到2005年終於喺藝術市場重現，之後專家用長達6年時間大規模修復同鑑定，先確定《救世主》係達文西現存嘅罕有真迹，佳士得話大師真迹世上估計少於20幅咋，聽講有藝術館想邀請展出作品，但唔知收藏家意願，唔想錯過傑作，記得去佳士得中環藝廊望吓，即日起至下周一免費展出，係首幅喺亞洲展出嘅達文西真迹！