立法會內委會噚日就舉行咗今年度第二次會議，為咗慰勞一班議員啱啱「開學」嘅議員，內委會主席民建聯李慧琼「琼子」特別喺會後請議員食蛋糕，而且琼子出手一啲唔弱，佢請議員食嘅係經常要排長龍先食到的Lady M蛋糕，琼子話希望議員下星期三進入大辯論之前輕鬆一吓，有多口議員就問琼子，係咪咁快請佢哋食嫁女餅？琼子當然就否認喇。
琼子噚日就安排咗6個Lady M蛋糕同議員分享，唔少建制派議員何君堯、郭偉强都有畀面捧場，而象哥黃定光仲食到大合照都唔影。不過Lady M蛋糕似乎對泛民議員就冇乜吸引力，到最後只有民主黨黃碧雲捧場，佢趁建制派走得七七八八先入去食，黃碧雲仲話入去食前掙扎咗10分鐘，因為佢怕肥喎。