立法會財委會主席陳健波經常要坐定定主持會議，本來會議兩個鐘一節，佢每隔一陣都可以鬆一鬆條腰骨嘅，點知陳健波計劃下星期開始，正式執行主席指引，將每節會議時間，由原本兩個鐘，大幅延長到8個鐘一節，固然限制咗泛民拉布，但呢一招其實都係七傷拳，敵傷一百自己亦傷五十，因為咁做波哥都冇咗每隔兩個鐘嘅小休時間，變相搞着自己。
不過八方發現，波哥原來一早自備私家咕𠱸墊住條腰，唔知係準備同泛民長期作戰，就算開足8個鐘都唔會攰喇。不過波哥同八方講，其實佢以往主持會議，都有用私家咕𠱸，唔可以話特別為長期作戰而準備，佢反而話用私家咕𠱸主要原因，係防止因長期坐喺度，搞到腰間盆突出，因為保護自己條腰骨真係好重要。