麥菲文呢位新練馬師夾住名氣來港大展拳腳，晨課上每每成為焦點人物。事實上，佢嘅一舉一動確實異常矚目，就以今朝（10日）為例。
練者除了在烽火台打錶記錄每匹馬操練之外，仲走往上落馬沙圈仔細打量一番，事事親力親為。
當中兩匹周三（11日）谷中夜戰賽程馬，「蓮花巨星」及「領航大師」今朝熱身後，均前往內圈加課踱步，見倉主麥菲文老早企響馬房入口處守候打點一切，過程之肉緊，實難以筆墨來形容。
尤以列陣第四場三班1800米「蓮花巨星」，上仗跑谷草1650米，在路短情況下閃閃身即跑第四，熱身一場後再做工夫，今次增程跑1800米啱晒呢匹中長途馬發揮，睇嚟馬房目標清晰，千祈咪走寶。