嶺南大學學生組織「嶺事館」早排發起「佔嶺行動」，抗議校方對校董何君堯「殺無赦」言論等不當行為唔出聲又唔追究，原本嶺事館邀請何君堯出席論壇，點知何就話因公事未能出席。
不過最神奇係，佢向「嶺事館」提出，想邀請6至8名同學一齊搵間酒樓，大家坐低飲茶傾吓偈，又希望冇記者同傳媒在場，話咁先可以暢談時政！
不過「嶺事館」對同何君堯飲杯茶食個包冇乜興趣，佢哋喺facebook先感謝何君堯邀請，但就話明唔會出席任何私下會面，強調請何君堯去學生論壇嘅目的，係希望校內同學、校方、校友、教職員，可以尋求一個公開平台，交流對院校言論同學術自由、校內民主牆使用原則，同埋對何君堯言論嘅睇法，所以溝通唔可能只有學生代表，係需要有一個各界平等參與嘅平台，話希望公眾同何君堯諒解。