活化工廈確實帶嚟過一啲好處，但到咗今日都行咗7年，亦有唔少問題出現。公民黨飛機師譚文豪噚日就喺內會要求整番個小組跟進吓，事關工廈問題涉及多個問責局同部門，所以個小組整係內會之下就最好喇。建制派都唔少人支持飛機師睇法，但就覺得個小組好似放番喺發展事務委員會啱數啲。
實情飛機師對於個小組設喺內會之下定發展事務委員會冇乜大意見，不過佢緊張呢個議題，所以話放喺內會下面排隊排得快啲。建制派唔知係咪逢泛民必反，好似經民聯林健鋒、民建聯劉國勳、自由黨張宇人咁，冇話反對成立小組，不過放番喺發展事務委員會好啲咁啫。
雙方用咗好多時間拗完一大餐，呢個時候內會主席李慧琼終於出聲話，其實個小組係under內會又好、under發展嗰邊又好，都係排緊同條隊㗎咋﹗原來拗嚟係無意思嘅，早講咪得囉！而投票結果係22票贊成、19票棄權，過咗。