民主黨前主席何俊仁早前驚聞自己患癌，好彩發現得早及時醫治，經過一輪休息，𠵱家已經好咗好多，亦已全面恢復工作。八方日前見到仁哥，問候佢身體情況之餘，亦關注佢康復之後有冇鍛煉身體？仁哥同八方講，經過今次個病，佢都不得不承認真係要做番多啲運動，操番fit少少個身體，於是佢早排開始孖住民主黨創黨主席李柱銘去行山咯。真係唔行唔知身體好，仁哥一同馬丁行山先知，馬丁年紀大過佢，但體能又真係好過自己好多。
仁哥大病初癒，八方見到佢𠵱家講嘢仲係唔太夠氣，胃口亦冇舊時咁好。但好在當日佢都相當精神，只係身形清減咗少少，八方問佢𠵱家康復進度點？佢話呢幾日先開始唔使再食止痛藥，不過早幾日又感親兼發燒，搞到日前十˙一反威權遊行，佢都要喺屋企休息。
黨友輪流接更陪行山
仁哥經過今次之後，明白鍛煉身體對保持健康好重要，所以佢早排開始的起心肝定期行山，每個星期keep住至少上山頂行一次，有時係馬丁陪佢，有時就係黨友單仲偕、李永達陪佢。一講到行山，仁哥即刻大讚馬丁，話馬丁真係行得好鬼快，半個鐘就行完一個圈，佢就要成45分鐘先得，有時馬丁行遠咗，仲會走番轉頭搵仁哥㖭！其實多做運動真係對保持身體健康好重要，睇馬丁就知喇，仁哥最緊要持之以恒去行山呀﹗
李八方