林鄭新班子陸陸續續已經上任，噚日立法會召開本年度首次嘅內委會同財委會會議，年僅28歲嘅創新及科技局局長政助張曼莉，噚日由續任保安局政助嘅「師兄」劉富生帶住遊立法會，仲好主動同傳媒打招呼㖭。不過，之前喺新世界集團任職嘅張曼莉可能較少面對傳媒，面對提問時怕怕醜醜，不時要劉富生在旁提水，睇嚟答問技巧就有待改進喇！
除咗張曼莉，前TVB新聞「小花」李惠亦加盟政府，出任特首辦特別助理，佢噚日就落咗立法會同一眾議員打招呼，不論泛民建制議員都同李惠有傾有講咁，相信佢人緣不俗。民建聯立法會議員陳克勤十幾年前亦曾經做過特首辦特別助理，唔知李惠噚日落立法會有冇特別向佢偷師呢？