歡樂嘅時光過得特別快，立法會議員又係時候要同暑假講bye bye喇。雖然立法會大會下周三先正式復會，不過噚日已經率先要召開內委會同財委會會議，而主席梁君彥噚日中午就按照立會傳統，喺宴會廳主持切燒豬，攞個好意頭，慶祝新一個立會會期嘅開始，一切順順利利，而一班建制議員亦有同場參加。
梁君彥作為主席，梗要為新會期開始講番兩句嘢，佢話2017至2018年立法會年度即將開始，佢祝願各議員同事暢所欲言，齊心為市民服務。在場唯一嘅民主黨黃碧雲就立即寸佢，話梁君彥係至好講呀，梁君彥亦即時反駁佢，叫議員唔好係又講唔係又講，反寸班民主派議員。梁君彥之後仲話，買咗5公斤來自西西里島嘅開心果，唔知有冇特別含意呢？