立法會放完暑假，噚日先開嘅內會、財委會都率先開咗第一次會議選新主席，當然選舉結果完全冇意外，內會正副主席同上年一樣，分別由民建聯李慧琼同埋公民黨郭榮鏗做，至於財委會正副主席就係無政黨陳健波、田北辰做，咁建制派人多梗係瞓喺度都贏，但田北辰比陳健波更威，唔止瞓喺度都贏，直情個人唔喺度都贏！
噚日係選咗內會正主席先嘅，由於李慧琼、郭榮鏗同場較勁，所以由資歷最深嘅民主黨涂謹申主持大局，結果李慧琼以37票、撼贏得21票嘅郭榮鏗做主席，而郭榮鏗就喺無對手下自動連任內會副主席。
梁繼昌自爆想揸波哥大髀
去到財委會選主席，陳健波就以33票冧莊，而民主派支持嘅梁繼昌只有15票。到副主席選舉，民主派又支持梁繼昌選，而李慧琼就走出嚟話二少經已同佢單咗聲，託佢同大家講佢想選，希望得到大家嘅支持。咁都得？人多勢眾咪得咯。
到候選人質詢，只得梁繼昌一個人答晒。梁繼昌話，陳健波為咗健康着想，將來主持會議要控制吓情緒，又話為免波哥太激動，有需要時會「揸一揸佢大髀」㖭。但梁繼昌最後都係得21票，人唔喺度嘅二少就有33票。