噚晚廣州恒大（紅衫）喺亞冠盃八強次回合主場對上海上港前，班主許家印將恒大晉級獎金提高到2,000萬人仔，連埋入波獎金共有3,500萬人仔（約4,200萬港元），球隊為咗反勝盡一切辦法，最後加時後賽果贏5:1都冇用，雖然唔計作客入球，但互射12碼恒大都輸4:5出局。許老闆重賞之下恒大有勇夫，阿倫21同35分鐘各入一球，換邊後高拉特接力，83同91分鐘各入一球踢加時，上港中場汪佳捷同王燊超加時兩黃一紅離場，點知上港前鋒侯克110分鐘射入離門約30碼嘅罰球，雖然高拉特完場前射入12碼再次追平，但係互射12碼首輪佢就射失，就係咁恒大輸4:5，許老闆嘅銀彈攻勢，可留番下屆先用嘞！