咩叫退而不休？前湖人球星拜恩（Kobe Bryant）就係好例子，雖然喺2016年已經退役，不過出席活動仲見到佢身形咁弗，就知道佢冇偷懶。拜恩日前已經嚟到中國海南，準備中國之旅，雖然未必搵到人同佢打籃球，拜恩一樣苦練，周一晚仲做gym做到凌晨四點，真係夜媽媽經過gym房都俾佢嚇一嚇。
代表NBA簽約建籃球中心
拜恩周二活動就認真頻密，朝早先到海口電影公社參觀，同香港前泳手、明星方力申有傾有講，之後「黑曼巴」就到華僑中學交流，仲親自落場教一班中學生射波，而且女同學玩三分大賽，拜恩都冇理到身份，做埋執波仔幫女同學手。最後一站就係記者會，原來佢代表NBA賽會，同海口觀瀾湖合辦籃球訓練中心，中心將會興建多達六個籃球場，NBA亦會派高水準教練到海口，培訓當地學生，中心會喺2019年啟用，希望之後可以為中國培養籃球新星。