上星期六踢頭，紅牌。星期日又踢頭，黃牌。星期一再踢頭，冇牌。周一英超，頭三場輸晒嘅韋斯咸返到主場終於開齋贏波，靠奧比安同阿休喺比賽末段各入一球，以2:0擊敗哈特斯菲爾德。球隊贏波為領隊比歷減壓兼賀壽，但呢位克羅地亞教頭都要抹一把汗，今場波韋斯咸守將雲斯頓列特一次搶波踢中對手頭部，不過佢就比利記嘅沙迪奧文尼同紐記嘅馬特列治好彩，黃牌都冇張。
比歷收最佳生日禮物
比賽日係9月11號，亦係韋斯咸領隊比歷嘅49歲生日，不過佢喺周一場波賽前應該冇乜心情慶祝，事關韋斯咸喺頭三輪聯賽全部輸晒，眼見到周日輸埋第四場嘅水晶宮，球會已經開刀將領隊法蘭迪保亞炒魷，比歷呢場波唔贏的話，隨時成為今季第二位英超被炒主帥。
今場波亦係韋斯咸喺今季首次主場作賽，面對升班馬哈特斯菲爾德，要到72分鐘先打破悶局，奧比安射門省中對手改變方入網；五分鐘後再由阿休入波鎖定勝局贏2:0，主場全取三分。韋斯咸終於拎到英超第一勝，至於佢嘅難兄難弟般尼茅夫同水晶宮就仍需努力，後兩者都係四戰全敗。
領紅文尼上訴求減刑
韋斯咸三分袋袋平安，不過比賽期間都出現過驚險場面，令壽星佬比歷汗顏。守將雲斯頓列特一次同對手穆尼爾爭波，一下朝天腳踢中對方個頭，不過今次莫講話牌都冇畀，執法球證奇雲費特甚至唔認為係犯規，示意比賽繼續。上周六曼城主場5:0大勝利物浦場波，紅軍翼鋒沙迪奧文尼一次飛身搶波，踢中曼城門將艾達臣摩拉斯嘅頭，被直接出示紅牌趕出場，賽後惹嚟唔少爭議。
到周日紐卡素作客贏史雲斯場波，紐記嘅馬特列治又向對手踢頭，但只係被罰黃牌；到咗周一再出現踢頭事件，點知今次罰球都冇，隨即引起網上熱議，指執法尺度唔統一。
另外，據報利物浦球會打算就文尼停三場刑期提出上訴，希望至少可以唔使停咁耐，而被踢中嘅艾達臣摩拉斯周一已經戴住頭盔參與曼城操練。
韋斯咸贏波，除咗比歷之外亦要恭喜吓佢哋嘅門將赫特，終於打破魔咒零封對手，之前連續喺22場頂級聯賽失波嘅走勢終於告一段落。赫特上季被曼城外借咗去拖連奴，自從由今年一月起，喺每場聯賽都有失波，今夏喺槌仔頭三場英超失咗10球，連續聯賽失波場數累積到22場，總算喺今場波拎番次清白之身。