效力皇家馬德里嘅葡萄牙球星基斯坦奴朗拿度（C朗），𠵱家仲係停賽中，國際賽後又要休戰。冇真波踢不妨去虛擬世界踢吓假波。人氣電玩足球遊戲《FIFA 18》喺9月尾就推出，封面人物C朗嘅能力值被設定為94，不過有球迷就唔同意，喺官方宣傳活動發表意見，認為C朗冇100都應該要有99，C朗似乎都好認同，手舞足蹈話自己好似部機器咁勁。
《FIFA 18》出品公司日前為隻game做宣傳，各代言球星透過網上讀球迷留言，C朗就讀出有位球迷，希望出品公司將C朗能力值改做99或者100，話C朗喺球場上根本就係一部機器。C朗讀完後話：「當然啦，我就係一部機器！」之後仲擺埋古怪pose。其實官方仲未正式公佈隻game最高能力值嘅球員，不過據講現役球員裏面，C朗同美斯同樣有94分並列最高，其他有九字頭能力嘅球員，仲有德甲拜仁慕尼黑雙雄，門將紐亞92，前鋒羅拔利雲度夫斯基就有91。
晒350萬紫色跑車
唔打機嘅話，C朗梗係不愁冇其他玩具玩，日前喺佢社交網度晒佢架紫色法拉利F12trs新跑車。C朗呢架新車價值35萬鎊（約350萬港元），最高時速可達340公里，但對於周薪達36.5萬鎊嘅佢嚟講，真係濕濕碎。
同C朗一樣咁夠人氣嘅男子100同200米世界紀錄保持者，牙買加「閃電」保特，近日喺日本一樣有機打，日前佢同川崎前鋒球星小林悠合作打足球game，不過就唔係《FIFA》系列，而係日系嘅《PES》，遊戲廠商仲特別加咗保特入去川崎前鋒度，着12號球衣。保特落場梗係要對手食塵，結果佢喺場波入兩球；不過拍檔小林悠仲威，入多保特一球連中三元，結果川崎以6:0大勝多蒙特。