呢個暑假，除咗「天鴿」襲港，雙學三子因為政府覆核刑期而改判入獄，仲揭露「社會近年瀰漫一『鼓』歪風」。
泛民允籌錢助小麗上訴
呢股法治旋風下周一（11日）又再捲起，上訴庭當日下午會就反東北13人案刑期頒佈裁決理由，屆時會唔會再現「歪風（unhealthy wind）」？暫時當然未知，9.11當日同時亦係四議員DQ案嘅上訴期屆滿日，到底九龍西係咪會合併補選？還看劉小麗會唔會提出上訴！
八方噚日問過小麗，佢強調仲考慮緊上訴，正積極同泛民商討中，據知泛民答允籌錢助小麗上訴，似乎九西極有機會兩席分開補選。
9.11後，9.19亦係關鍵日，佔中九子因為傘運而被控「串謀作出公眾妨擾」等罪，案件當日提訊，勢必掀起新一場「以法達義」討論，由於當中涉及兩名立法會議員陳淑莊同邵家臻，最終裁決影響立法會係咪再少兩個議員，難怪民主派都話要做好防風措施。
而港大學生會前會長馮敬恩去年圍堵港大校委會擾亂秩序罪成，則喺21日宣佈裁決。加上28日係傘運3周年，上述唔少案件，或多或少都同傘運有關連，試問又點會唔重要？
李八方