據英國《太陽報》報道，迪亞高哥斯達（DC、圖）泊喺車路士Cobham訓練基地外面嘅Range Rover，已經被下令移咗去青年軍用嘅位置。哥斯達喺今個夏天收到領隊干地通知佢已經唔係自己計劃之內嘅短訊，一心想重返馬德里體育會嘅佢之後就飛咗返巴西，而佢架車就一路泊喺車仔訓練場外面。不過，車仔方面似乎覺得DC冇必要再將架車同一隊隊友泊埋一齊，仲將佢移咗去訓練場另一邊嘅青年軍區域，報道亦指由於DC拒絕歸隊參與季前訓練，會方早前已經清咗佢個locker。DC冇被列入車仔今季嘅歐聯大軍名單，加上連一隊車位都冇埋，睇嚟佢都好大機會喺1月轉會窗落「車」。