轉戰搞鹹蛋超人show嘅亨泰（197），今個月初喺澳門開show，為期一個月。可惜遇上強颱風天鴿襲澳，令澳門多處停水停電，威力連超人都頂唔住，亨泰被迫提早結束活動，並喺facebook公佈退票「回水」。睇怕除咗掌控李氏力場嘅長和系主席李嘉誠「李超人」之外，其他超人都好難抵抗到颱風！
查實亨泰今年初就用咗1.8億，投咗鹹蛋超人在港澳台大型表演活動的IP返嚟，合約為期4年，諗住開拓新業務，又已經租用咗威尼斯人酒店諗住大搞，點知遇上颱風，認真得不償失。雖然未知亨泰出師不利，會唔會令公司就咁疊埋心水搞返消費品業務，但估計天鴿令澳門短期內好難再開show，其他場唔係滿檔期就係太貴，睇怕今次亨泰都要幫超人諗諗計先得。