特區「第一先生」、特首林鄭月娥嘅丈夫林兆波噚日為一個喺公開大學搞嘅數學講座做主持，佢開始前接受八方訪問，對於近日太太林鄭月娥民望上升，身為丈夫點睇？佢對呢個問題，一時為之語塞，可能因為民望，計數幾叻都計唔到升跌，定抑或驚答錯問題，驚返到屋企要罰扭耳仔？而當問到白襪問題，佢就笑晒回應，仲自爆埋着襪嘅小秘密。
林兆波定過神後細心解構，話民望好易受到一兩件事影響、波動可以好大，民望當然重要，但唔能夠擺太多精神，因為有時唔喺當事人控制之內，形容呢屆政府前路仲係困難重重。咁太太有冇同佢分享工作上嘅壓力？林兆波話壓力肯定有，老婆唔講都知。咁佢點樣睇得出？「我見佢嘅時間好少㗎咋！佢又多應酬，又多會開！」點解唔跟林鄭出trip？林兆波貫徹始終話想保持低調，難怪一個公職都冇做。
唔少人記憶猶新，林兆波喺太太七一宣誓就職當日以一對小白襪力壓全場，搶晒焦點，林兆波一被問到點解「白襪一疏」時笑晒回應：「其實報道兩邊都有，（話你純情喎？）一個話純情，亦都有人話唔啱規矩。其實都係得啖笑。（你自己介唔介意？）第一眼睇到，如果係批評，個個都好自然覺得『使唔使咁講呀？』，但其實諗深一層，其實有乜所謂，得啖笑啫。」
話數學同老婆阿仔都係至愛
佢話大家只要睇吓佢嘅衣着，就會知道佢根本冇乜講究，「舒服就得」。咁係咪鍾意着白襪先？噚日着K-Swiss白波鞋搭灰襪仔嘅林兆波自爆小秘密：「其實我唔鍾意着襪㗎！」佢仲話自己有次喺港鐵睇英文報紙，但冇着襪，俾人影到，仲上埋《蘋果日報》㖭呀！
點解噚日肯高調出席數學講座做主持？佢話個講座教授同佢好熟，雖然好忙，但老朋友叫到，咪幫手做主持：「數學係我嘅至愛，除咗我老婆同我兩個仔之外，3個都係我至愛。」原本佢以為個講座會因為打風而取消，令佢可以瞓到下晝4點，點知個風走得咁快。
對於近日有16位年輕人被判囚，林兆波話自己好同情啲後生仔，但法庭亦有佢嘅理據，「佢哋後生仔或多或少有衝動，佢哋覺得要做一啲嘢，我都好同情佢哋」。
李八方