香港許多保守人士，開口埋口尊重法治，但一聽見雙學三子判囚，便以為法治得到彰顯，可見根本不知法治為何物。較複雜的法律原則問題，明天再說，現在先問兩道簡單問題：黃之鋒這群年輕人為什麼那麼「乞人憎」？──反國教時黃不是「英雄」嗎？──答案顯而易見：佔領運動阻街嘛，影響市民生活嘛。這點不必爭議，只是藍絲們忘了再問：為什麼他們可以公然犯法，犯足七十九日？類似問題，藍過藍絲的我，在佔領後七日已問了，可惜我當時未有每日專欄，否則必然天天追問：怎麼梁振英還不下令清場？
佔領運動引發的不便，我瞭如指掌，因為有個友人住太子道，每次一見面她就拍枱拍櫈：「我而家巴士都冇得搭，真係唔得佢死呀！」然後滔滔不絕訴說慘況，再痛罵佔領者。有一天我終於忍不住說：「你鬧佔領者係啱，佢哋的確犯法，的確阻X住你，但你似乎唔記得鬧佢哋嘅共犯！」「咩共犯？共產黨？」這時候，輪到我拍枱拍櫈了：「依家有人打劫你，你報警，差佬話等等，第二日再劫你，差佬又話等等，如是者你畀人劫足七七四十九日，我問你，你應該鬧邊個呀？佔領者非法集結，破壞社會安寧，我知吖，咁話明非法，執法者仲唔執法？你有冇交稅呀！依家政府唔做嘢，根本係同非法集結者合作，唔係，直情係政府鼓勵人繼續犯法！講起上嚟，連你都係共犯，你藍絲吖嘛，做咩唔畀壓力政府清場呀？你有幾藍呀，睇過！」友人見我越罵越兇，竟反過來安撫我。
社會近年確實瀰漫一股由梁振英吹起的歪風，簡稱Y風：原來只要犯法者夠疊馬，警察便可幾個月不執法；原來為了令抗爭者激起民怨，政府便可幾個月置民生於不顧。邏輯上犯法者當然犯法，但執法者不執法，這是什麼玩法？你當時沒譴責政府是共犯，你現在夠膽自稱尊重法治？