馬德里體育會上周六喺西甲新一季首戰作客「升班馬」基羅納，落後兩球下雖有法國球星基沙文生涯首次領紅被逐，但最終仍以2:2逼和對手。
馬體會今戰面對首次升上西甲嘅基羅納，但喺22同25分鐘俾史杜安尼接連入波，上半場已落後0:2。換邊後，馬體會球星基沙文喺66分鐘被指插水，球證向佢出示黃牌後再立即出示紅牌將佢驅逐。據西班牙《馬卡報》報道，指基沙文當時鬧球證「你係一個puxxy」所以領紅。雖然基沙文賽後已經去咗球證更衣室同球證道歉，但根據賽例有可能會被罰停賽兩至四場。
不過馬體會喺少踢一人下，78分鐘由安祖哥利亞破網追回一球，戰至85分鐘再由荷西基文尼斯扳平，結果雙方以2:2握手言和，各得一分。
另外，一直同領隊干地鬧不和嘅車路士前鋒迪亞高哥斯達（DC、小圖），早前拒絕咗中超球隊上海上港同天津權健嘅報價，並有望明年一月正式過檔馬體會。據西班牙電台《Estadio》報道，馬體會就DC嘅轉會交易向車仔報價4,500萬歐元（約4.14億港元）轉會費，另加1,000萬歐元（約9,200萬港元）附加條款，並已經同車仔達成共識。