上星期虞鋒、阿里巴巴創辦人馬雲旗下雲鋒金融（376）聯同其他投資者，斥131億元買下美國萬通亞洲，買家名單粒粒巨星，又再睇到馬雲人脈幾咁廣。
好似其中一位，體育股中國動向（3818）主席陳義紅出資6.4億元入股萬通亞洲4.9%。睇番資料，陳義紅同馬雲關係幾好喎，阿里2014年美國上市，中國動向以7.8億元認購股份，阿里之後股價升得靚仔，中國動向揸住手貨現市值升逾27億元。
除咗投資阿里，中國動向亦投資三批雲鋒基金，共值4億人仔。需知道中國動向上半年收入都係得6億人仔左右，已經投資咁大筆錢落阿里同雲鋒，可見馬陳二人情比金堅。
年近60嘅陳義紅，後生時原本有機會成為乒乓球運動員，但體檢不達標，轉去參加解放軍，後來走去幫「體操王子」李寧打工，之後自立門戶，今時今日直情可以同馬雲一齊食大茶飯。所以話呢，人生真係好奇妙，除咗努力，識到人應該都係好緊要。