大台節目《Big Boys歷險記》有傳因為人稱「龍哥」嘅法科師傅杜慶龍，喺第一集去咗西貢曾發生嚴重交通嘅地點超度嘅時候，佢嗰種freestyle嘅念咒方式兼喊晒嘅片段，搞到高層嫌膠味太濃，結果由四集變二集，再cut埋龍哥嘅片段目！
但係用得又唔好嘥，前晚大台將抽起嘅片段，擺咗喺網上播映，今次係龍哥幫Regen驅鬼，「乾坤一開」之後，龍哥喺張惠雅(Regen)背脊同頭頂起勢拍，捉吓一隻、捉吓又一隻，話咁快幫Regen捉咗3隻「妖魔鬼怪」出嚟，跟住仲幫佢調理埋個身體，發現Regan嘅子宮、輸卵管有問題。
昨日Regen接受傳媒訪問，佢話自己前晚都有睇返啲片段，講到當時嘅情況，佢話：「其實一開始話驅鬼係有啲驚，之後就係同條片一樣，三七氣流一轉就完喇，不過我自己都有啲愕然，因為我本身真係有啲婦科問題，但係龍哥話唔會咁快有轉變，要等一段時間慢慢去調整返，前幾日都佢都喺挪威打電話俾我，跟返我個case，再幫我三七氣流轉多一次，佢真係好好。」
Regen仲話：「其實呢啲片段可以再播都覺得好開心，我哋專登一班人上咗廣州拍，幕後人員真係專登搵真嘅料去個度，再搵龍哥去睇吓，拍嗰陣我哋受到有啲地方都好唔舒服。」