單文柔去年參加港姐時，曾以黑馬姿態殺入最後十強，佢除咗被傳媒形容為「黑馬」之外，更有報道指佢係佳麗心目中嘅是非精，當時有報道指單文柔鍾意黐埋大熱佳麗搞小圈子，但係佢就好大方回應傳媒話全部佳麗都係大熱，冇可能避開佢哋。
賽前是非多多，選完之後一樣多。咪就係因為同陳展鵬戀情曝光，令單文柔成為被追訪對象。
陳展鵬昨日成為周刊封面人物，佢話，單文柔承受不少壓力，佢甚至「笑指」覺得女方有啲「思覺失調」——其實「思覺失調」係一種病，唔好笑0架，正如你唔會笑指對方喉嚨痛咁……
陳展鵬嘅意思係，單文柔因為同陳展鵬嘅關係而成為焦點人物，承受網民攻擊批判，亦經常被傳媒追訪，搞到自己精神緊張，成日疑神疑鬼，以為俾人跟蹤。陳展鵬話，同單文柔傾偈時，「都覺得佢開始有精神病」。
陳展鵬話，對一個新人而言，單文柔依家受嘅壓力真係好大，做乜嘢都俾人影，自然有種無形壓力，幸而單文柔已經處理得好好。其實佢好擔心如果女方handle唔到，一爆出嚟就大件事。
單文柔的苦，真係全盛時期四大天王嘅另一半先會深切感受到。