其實唔少馬仔都好細膽，附近一有少少嘢郁得動作大啲，都會嚇到自己雞飛狗走或者猛咁嘶叫，但當然亦有例外，有些馬膽大傲氣重。例如「巴基之星」就係一匹充滿性格嘅馬，想罷跑就罷跑，而香港一班記者去到英國Longholes復康及賽事訓練中心，就見到一匹同「巴基之星」般差唔多嘅百厭臭脾氣馬出現。
馬會主持Sabrina喺呢個中心，繼續貫徹佢喜愛動物嘅性格，一見馬就不斷摸馬頭同埋同佢哋傾偈，但唯獨有匹馬就相當古靈精怪。
當Sabrina摸佢嘅時候，呢匹馬突然打開口，旁人以為想咬Sabrina，原來呢匹百厭星對佢條頸巾有興趣，以為係食物。即使Sabrina想搶回頸巾都唔放口，雙方更展開角力，惹得周邊的團友大笑起來，最終Sabrina的頸巾充滿呢匹馬嘅食物草渣，相信要報銷了。