年輕人如果唔一味儲錢買樓，閒時去吓旅行或許有更大得着！浸大、城大同科大嘅學生早前組隊代表香港參加日本東京舉行嘅「世界天才會議」，憑住初創企業項目喺72個參展項目中突圍而出，連奪特別金獎同優秀創新項目獎，呢個團隊早前又參加香港青少年天才大會，亦贏到特別金獎。
到底咩初創項目咁有創意，可以屢奪殊榮？佢哋嘅項目名為「HomeTaste」，意念係將訪港旅客同本地市民連繫起來，旅客可以透過網上程式，搵到本地家庭提供地道菜式，令遊客可以認識香港嘅飲食文化、風土人情，而本地家庭又可以賺取外快。
團隊成員之一嘅江澤鳴話，創作靈感來自出外交流嘅經驗，覺得餐桌上嘅交談，最能促進國際文化交流，同時亦能透過美食與人連繫，體驗當地文化。