感情生活一向備受關注嘅「Package男神」劉鳴煒，最近喺facebook上載一幅情深款款，同一位女士出席Speed Dating（極速配對）嘅相，莫非男神想再公開宣示開番盤？
大家咪誤會，其實呢個係一個以速配形式進行嘅青年政策focus group（小組座談會），身兼青年事務委員會主席嘅劉鳴煒話，希望可以藉此與唔同青年持份者對話，了解大家需要，相信對將來制訂香港第一份青年政策有作用，佢仲透露稍後會喺佢facebook專頁公佈參加呢種「速配」嘅方法，叫大家留意喎！
其實男神呢排除咗參加「速配」，仲去咗電競吧Versus Stadium同年輕人打機，對打《街頭霸王V》兼勝出，佢仲話：「唔通我係街霸高手，又話你知咩？」