特區政府未來嘅重點工作之一，相信包括大灣區嘅規劃，政制及內地事務局局長聶德權講過，首要工作係跟進《深化粵港澳合作推進大灣區建設框架協議》；咁又係，阿爺重視嘅項目，林鄭班子當然要全力以赴，向來執行力極高嘅政務司司長張建宗自然會好落力咁做。
政府噚日出稿，話張建宗今朝一早會起程去中山，出席由廣東省粵港澳合作促進會舉辦嘅「粵港合作論壇之粵港澳大灣區發展高層峯會」，出席呢個峯會嘅仲有廣東省政府同埋澳門政府高層，張建宗亦會喺會上致辭，風塵僕僕，同日返港。
署理財政司司長劉怡翔噚日亦喺「2017粵港經濟技術貿易合作交流會」開幕禮致辭時提及大灣區，話香港要把握粵港澳大灣區呢個契機，為經濟發展開拓新空間。作為大灣區主責官員，聶德權有冇壓力？