食物及衞生局局長陳肇始（Sophia）、警務處副處長趙慧賢（Winnie），兩位除咗都係新班子上任唔夠一個月嘅女高官，原來仲有一個共通點——都係祖籍潮州嘅「自己人」。
話說噚晚香港潮屬社團總會搞咗場慶賀同鄉受勳嘅晚宴，Sophia同Winnie都有出席。佢哋嘅服裝都好貼合工作性質，前者身穿連身裙，凸顯護士嘅優雅；後者身穿黑色上衣同長褲，頗有幾分警察英姿。佢兩位仲有合照，似係想話畀人聽，女性都可以「也文也武」喎。
其實除咗佢兩位一文一武潮人女高官，現屆政府仲有唔少潮州幫㗎，例如有到場嘅商經局長邱騰華，同埋冇到場嘅財政司司長陳茂波。