曼城喺洛杉磯舉行嘅國冠盃上半場同皇家馬德里互無建樹，但下半場就大發神威，憑住參與咗三個入球嘅奇雲迪布尼兩度助攻，以4:1大炒皇馬。
有丹尼路雷斯「地標」倒戈皇馬嘅曼城，今場踢法進取，但兩隊上半場都入唔到波，不過換邊之後，曼城喺52分鐘終於打開紀錄。當時奇雲迪布尼開出角球，史東斯頂槌攻門畀後備上陣嘅卡斯拿撲出，再由奧達文迪補射得手而領先1:0。59分鐘，史達寧接應迪布尼傳送後再推近射入。迪布尼喺65分鐘曾經主射罰球中柱唔入，但1分鐘之後就助攻史東斯，協助曼城領先到3:0。到咗82分鐘，曼城由下個月先至18歲嘅年輕球員巴謙戴亞斯射成4:0，而皇馬就到臨完場先至由小將奧斯卡喺30碼之外射入世界波破蛋。