一個叫致光，一個又叫智光，同樣姓羅，估唔到連酒店都搞錯兩人。勞工及福利局局長羅致光（CK）同傳媒茶敍，自爆有日收到文華東方酒店寄賬單嚟追數，睇番張單英文名寫「Kong」而唔係佢個「Kwong」，真相大白，即刻打畀公務員事務局局長羅智光，提佢有條數未找。八方好奇係乜賬單？CK話過咗20幾年唔太記得。
由教授到局長，人工幾級跳，但對CK嚟講頭半年可能白做，因為要申報資產，上任前賣晒十幾廿隻股票，「呢半年人工都唔夠蝕咗啲錢」，計落差唔多200萬，揸住乜貨咁傷？佢話有能源、物流、金融同地產股，內房就冇掂，風險太高。
前勞福局長張建宗出名工時長兼唔放假，CK話自己通常6點幾收工，「我唔走同事冇得走㗎」；上任近一個月放假有去游水、睇戲，平衡生活。唔少局長都開facebook同市民交流，CK話fb要互動，「一係唔好做，唔好整咗又唔答人」，所以要諗諗，個人fb則只得兩個朋友。