特首林鄭月娥暑假唔休假，要為一地兩檢打民意戰，但作為女強人嘅佢除咗照顧香港，亦有自己頭家要照顧。噚日有讀者見到佢去濕平，喺特賣場買床單枕頭，唔知係咪想遷入禮賓府後用？其間不時有市民要求「集郵」。
讀者蔡小姐話噚日上晝11時45分，見到林鄭喺銅鑼灣崇光濕平，林鄭喺兩個保鑣陪同下到21樓特賣場購物，「佢買咗一個枕頭、一張蠶絲被、幾套床單」。蔡小姐估計林鄭係有目標而來，主要係揀床單，「好似話買畀個仔，（佢）睇質料、價錢同花款，最後買咗淨色，反而枕頭好快決定」，最終埋單盛惠6,000幾蚊。
換走689赤化紅
林鄭濕平期間，樓層冇因為佢而封鎖，當時顧客唔算多，林鄭亦好隨和有禮，「同佢有眼神接觸，都會點頭、微笑，要求合照都來者不拒」，最後約逗留咗半粒鐘，喺中午12時15分左右走人。蔡小姐話林鄭親自為家人揀床上用品，認真體貼喎！
而標榜要有管治新風格嘅林鄭，佢個特首辦網頁率先改頭換面。前任特首梁振英一上場就將特首辦網站嘅飛龍標誌，由煲呔曾年代嘅彩色變成強國紅，赤化之心好強；林鄭上場後網頁設計大改，直接見到歡迎辭同佢落區嘅相，底部飛龍標誌亦因689離任而「喜形於色」，由紅噹噹變番彩色。
李八方