梵高大家就知係邊位，咁梵哥又識唔識係乜水？查實係運輸及房屋局長陳帆，唔好以為八方打錯字，因為呢個係局長自己貪得意嘅自封嚟㗎！
呢排梵哥頻頻出動，為一地兩檢方案護航，而佢唔係孤軍作戰，係同律政司司長袁國強及保安局局長李家超，以三箭頭隊形上陣。但法治始終係焦點，唔少法律界人士狂轟袁國強冇捍衞一國兩制，梵哥就主動為隊友抱不平，噚日出席電台節目後大讚袁國強「有良心」，話上任雖然只約一個月，但喺內部討論期間已見證對方好堅持，每個文本、每一行、每一粒字都會重複閱讀，獲佢同意先進行下一步工作，叫大家唔好政治化，極力為隊友平反。