民建聯早前換屆，增加3個副秘書長職位，分別係洪錦鉉、鄭泳舜、黎榮浩，連同原有嘅葉傲冬，合共4人。佢哋噚日同傳媒茶敍講分工，不過，有件事就要一齊夾手夾腳做，就係25周年黨慶活動，重頭戲係9月中喺紅館搞嘅愛國舞台劇，黨內元老、議員全部要踏台板演出，青年民建聯更加誇張到要試音，唱功有番咁上下先有機會演出呀。
民建聯今年黨員人數目標係3.5萬，今年過咗一半嘞，只係仲爭200人，要達標好easy。不過眾所周知，民建聯嘅支持者多數係長者，佢哋一直想開發年輕市場，所以收會員有個「10-1」要求，即每收10個新黨員，就有1個要係青年民建聯成員，青民主席顏汶羽呻被捽數，但今年已經有140個新人加入，算有交代啦。青民仲成立咗辯論隊，培訓成員應對傳媒、街頭演講、政策研究等。