立法會放暑假前夕，噚日就喺立法會大堂，搞咗個午間音樂會，請來一班小朋友表演音樂，仲請來唔少前議員出席，其中白鴿黨算最多人，除咗有前議員李華明、單仲偕，仲有早前先退咗黨嘅勞福局局長羅致光，難怪三人一見面，即雞啄唔斷。
單仲偕透露，自己早前去旅行期間，左眼視網膜突然脫落，趕番香港做完手術後，最近又發現左眼有白內障，下個月或要做檢查，度期睇吓幾時再做手術。
噚日除咗白鴿黨多人撐場，就連前立法局議員都有現身，佢就係前藝人張天愛爸爸、現年已94歲的張有興。盛傳將代表建制派參加新東補選的工聯會前議員鄧家彪，噚日亦搶閘「重返」立法會，聽呢班小朋友表演。問到佢係咪將會披甲上陣，鄧家彪就笑笑口話「咩可能都有」喎。