花旗銀行力谷Citigold戶口，搵嚟女歌手楊千嬅做最新代言人，仲要搵埋佢媽咪拍片分享下兩代情咁話，段trailer前日已經上載咗喺facebook，下星期一會有廣告首播禮，千嬅仲會分享下理財之道。
其實Citigold開戶門檻要150萬元，一般平民百姓未必有呢筆金額，所以係想攻高端客戶，花旗前排已經請咗胡孟青推廣自家股票app，真係頻頻請代言人，口味仲要咁唔同。
銀行界請明星推銷產品都唔係今日嘅事，舊年渣打搵咗鄭秀文去sell渣打亞洲萬里通萬事達卡，聽講反應唔錯；再之前就搵過陳豪sell信用卡；星展銀行張黑卡就搵咗古天樂長期合作，貪佢夠黑咁話。唔知滙豐、中銀又有冇計劃搵明星做代言人呢？