美斯（右）同女友……係老婆安東莉娜（左）先真，上周五已經喺阿根廷羅沙里奧拉埋天窗，不過依然新聞多多；其中因為喺婚禮入面，美斯媽咪施莉亞（小圖左）同安東莉娜「撞衫」，阿根廷傳媒就大炒特炒佢哋婆媳不和，睇嚟美斯有排頭痕。可能你會覺得，施莉亞條裙同安東莉娜件婚紗唔多似喎，不過喺西方，特別係阿根廷，佢哋都有一個傳統，就係喺婚禮度，其他嘉賓都唔會着白色或好淺色嘅衫，以免搶咗新娘風頭。幫施莉亞設計今次晚禮服嘅時裝設計師哥辛奴亦強調條裙本身係深色嘅，點知突然變咗銀白色，所以外界就估計係施莉亞有心搶安東莉娜風頭。畢竟，原來奶奶施莉亞一向都唔多鍾意安東莉娜㗎。
另外，未有獲邀嘅阿根廷球王馬勒當拿就似乎好葡萄，但就死撐美斯張帖應該係寄失咗喎。