【本報訊】一對夫婦昨早疑心急追巴士，在沙田大涌橋路遭駛經私家車撞傷，其中63歲丈夫最終不治。由讀者提供的現場圖片可見，事發後多名熱心市民在場急救。《蘋果》聯絡到其中一名救人的市民，原來他是休班消防教官，偕同事途經時目擊車禍即合力救援。他指女傷者傷勢不輕，但也不理痛楚，叮囑各人先為丈夫救援，真情流露，令人動容。
該名休班消防教官姓黃，身材健碩，任職消防逾10年，現時在消防學校教體能訓練。他憶述救人經過稱，當時他與兩名同事一起乘私家車途經，「轉左(入油站)嘅時候，望到側邊有個人攤嚮度，即刻打死火燈泊好架車衝出去」。他指出，男傷者後腦受傷、右腳折斷，「流晒血，啲血由傷口滲出」；在旁的妻子則雙手骨折，「佢係咁講唔好意思，係佢哋衝出馬路追巴士」，「佢冇理自己傷勢和痛楚，好激動咁叫我哋睇佢老公。我哋表示係休班消防，叫佢放心等我哋處理」。
黃Sir表示，除了他們3人外，還有一名自稱是在醫院工作的醫護人員經過，他身上有敷料。「我哋分工合作，有人幫伯伯撳住傷口，用敷料止血；有人就係咁提住伯伯唔好瞓；我就安慰佢太太。」黃Sir形容，女傷者右手骨折傷勢不輕，「直情變晒形」，於是代為致電通知其親友，並安慰她不要着急。
他嘆道，「佢老婆好堅強，不斷嗌緊佢老公，見到好心酸」，又指涉事司機表現亦很害怕，「佢冇嘢講，好驚」。以往也曾在嚴重車禍中協助拯救的黃Sir認為，作為市民，見到有交通意外應該幫手，「無論你去打交通又好，或做其他幫到手嘅護理服務又好，冇學急救都可以做其他幫手，因為現場人士都比較驚，應該有責任去幫手。而且我哋係消防人員，更加係有個使命感」。